Altıncı xəstəlik daha çox körpələrə və kiçik yaşlı uşaqlara yoxulan virus infeksiyasıdır. İnfeksiyanın törədicisi herpes qrupu viruslarının altıncı nümayəndisi olduğu üçün xəstəlik də buna uyğun adlandırılmışdır. Xəstəlik ilin istənilən fəslində müşahidə oluna bilər. Pasiyenti xəstəxanada yatızdırmağa ehtiyac olmur, adətən 1 həftə içində xəstəlik sağalır
Bu xəstəlik uşaqlara daha çox baxça mühitində yoluxur və əsasən 6 ay – 2 yaş aralığı uşaqlar xəstələnirlər. Böyük yaşlı uşaqlar və yetkin insanlarda isə nadir olaraq bu xəstəliyə rast gəlinir. Xəstəliyin bilinən digər tibbi adı isə “Roseola İnfantum”-dur.
Xəstəliyin əsas əlamətləri yüksək qızdırma və bu qızdırmanın ardıyca meydana çıxan qırmızı səpkilərdir.
Xəstəlik yoluxucudurmu ?
Bəli, qrip və digər buna bənzər virus infeksiyaları kimi bu xəstəlik də yoluxucudur və insandan-insana hava-damcı və tüpürkəclə təmas yolu ilə keçir. Yəni, bağçada eyni stəkandan su içən 2 uşaq bu xəstəliyi bir-birinə yoluxdura bilər. Yoluxucu olmasına baxmayaraq, qızılca və suçiçəyi kimi epidemiyalara səbəb olmur və ya nadir hallarda səbəb ola bilər. Qeyd etmək lazımdır ki, xəsətəlik səpkilər meydana çıxdıqdan sonra da, səpkilər meydana çıxmadan əvvəl də və hətta uşaqda yalnız qızdırma əlaməti olduğu dövrdə belə yoluxucudur. İmmuniteti zəif olan uşaqlarda ciddi xəstəlik mənzərəsi yarana biləcəyindən, əgər belə bir xəstəylə təmasdan şübhələnilirsə, bu uşaqlar dərhal həkimə aparılmalıdır.
Altıncı xəstəliyin simptomları haqqında daha ətraflı
Virusla təmasdan sonra xəstəliyin əlamətləri 1 və ya 2 həftə ərzində üzə çıxmağa başlayır. Bu dövrə inkubasiya dövrü də deyilir. Altıncı xəstəliyin əlamətlərini şərti olaraq əsas və əlavə kimi 2 yerə ayıra bilərik:
Altıncı xəstəliyin əsas əlamətləri
- Qızdırma – Bu xəstəlik adətən birdən-birə meydana çıxan və 38 C dərəcədən yüksək hərarətlə başlayır. Qızdırmalı dövr ,ümumən, 3-5 gün davam edir.
- Dəri səpkiləri – Temperatur düşməyə başladığı andan etibarən artıq dəridə səpkilər müşahidə olunmağa başlıyar. Səpkilər ,adətən, əvvəlcə döş, kürək və qarın nahiyəsində meydana çıxmağa başlayır, sonra isə boyun və qollara yayılır. Üzdə və ayaqlarda səpkilər müşahidə olunmaya bilər. Səpkilər çəhrayı rəngdə ləkələr şəklində olub, səthləri hamardır, lakin bəzilərinin səthi girintili də ola bilər, bununla yanaşı bəzi ləkələrin ətrafında ağ halqa da müşahidə oluna bilər. Səpkilər qaşıntı vermir və uşağı narahat etmirlər və ən geci 2-3 gün içində yox olmağa başlayırlar. Səpkiləri qızıcla və məxmərək kimi oxşar xəstəliklərin səpkilərindən differensiasiya etmək çətinlik törədə bilər.
- Öskürək
- Boğaz ağrısı
- Burnun axması
- Göz qapaqlarında şişkinlik
- Boyunda böyümüş limfa düyünləri
- Uşaqlarda narahatlıq hissi
- İştahsızlıq
- Zəif ishal
- Qızdırmalı dövr 7 gündən uzun çəkibsə
- Uşağın temperaturu 39.4 dərəcədən yuxarı qalxıbsa
- Səpkilər 3 gün ərzində yoxa çıxmayıbsa
İmmun sistemləri hələ zəif olduğundan və kifayət qədər anticisim istehsal edə bilmədiyindən 6-15 ay aralığında olan uşaqlar xəstəliyə yoluxduqda əlamətlər şiddətli ola bilər. Xüsusilə, immun sistemi normadan zəif olan uşaqlar risk qrupuna daxildirlər. 6 ay-a qədər olan uşaqlar isə risk qrupuna daxil deyillər, çünki hamiləlik dövründə analarından onlara keçən anticisimlər onları 6 ay ərzində qorumağa kifayət edirlər.
Xəstəliyin diaqnozu necə qoyulur?
Xəstəliyin özünə məxsus gedişata malik olan qızdırma dövrü modeli və qızdırma düşdüyü dövrdən etibarən səpkilərin meydana çıxmağa başlaması kimi klinik əlamətlər heç bir laborator analizə ehtiyac olmadan da xəstəliyə diaqnoz qoymağa şərait yaradır. Lakin, immun sistemi zəif olan uşaqlarda və ya ağırlaşmalarla müşahidə olunan vəziyyətlərdə əlavə olaraq, qan analizi verməyə ehtiyac yarana bilər.
Xəstəlik necə müalicə olunur?
Xəstəliyin özünəməxsus spesifik müalicəsi yoxdur, çünki bu bir virus infeksiyasıdır və xəstəlik boyunca aparılan əsas müalicə tədbirləri xəstəliyin simptomlarını zəiflətməyə yönəlmişdir. Yəni, biz sadəcə uşağa kömək edirik, xəstəliyin öhdəsindən isə onun öz immuniteti gəlir.
Xəstəlik virus infeksiyası olduğu üçün, müalicədə antibiotiklərin yeri yoxdur!
Xəstəliyin öhdəsindən tez gələbilmək üçün evdə aşağıdakı tədbirləri həyata keçirə bilərsiniz:
- Çoxlu maye qəbulu
- Yataq istirahəti
- Qızdırmanı salmağa yönəlmiş tədbirlər
Xəstəlikdən necə qorunmaq olar?
Hələ ki, altıncı xəstəliyə qarşı peyvənd yaratmaq mümkün olmamışdır. Xəstəlikdən qorunmaq üçün gigiyenik qaydalara əməl etmək lazımdır. Uşağınıza başqasının stəkanından su içməməyi, boşqabından yemək yeməməyi, öskürərkən və asqırarkən solfetka-dan istifadə etməyi və sonra dərhal o solfetkanı zibilə atmalı olduğunu və əllərini tez-tez yumalı olduğu kimi gigiyenik qaydalara öyrədərək, nəinki altıncı xəstəlik, həmçinin onları digər xəstəliklərdən də qoruya bilərsiniz.
Mənbə: [ Linkləri görmək üçün qeydiyyatdan keçin və ya giriş edin ]